Chi semoi?
LibreOffice el ze un software zestìo e dezviłupà da ła comunità, e l'è un projeto de l'organizasion no-profit The Document Foundation.
El software LibreOffice el ze dezviłupà da utenti che i crede inte i prensipi de'l software Open Source e inte'l scnpartir de'l só łaoro in maniera mìa restritiva. De baze a 'sti prensipi A ghe ze łe cuatro łibartà esensiałe e i prensipi contenjesti inte'l Manifesto par ła pròsema dècade de ła Document Foundation.
A credemo saldi che i utenti i gapie da aver ła łibartà de ezeguir, copiar, distribuir, studiar, modifegar e mejorar el software che distribuimo. Se da na banda A ofrimo ła posibiłità de descargar el software LibreOffice agratis, el Software Łìbaro el ze vanti de tuto na cuestion de łibartà, mìa de preso. A sostenjemo e promóvemo 'ste łibartà parché A credemo che tuti i łe mèrite.
A se metimo cofà obietivo de ełimenar el digital divide, suportar ła consarvasion de łe łengue native, evitar el software propietario e i formadi lock-in. A serchemo de otenjer i nostri obietivi:
- fornindo aceso łìbaro a i nostri strumenti par ła produtività de l'oficio agratis
- incorajando ła tradusion, ła documentasion e el suporto par el nostro software inte ła propia łengua nativa
- promovendo e partesipando ativamente inte ła creasion e dezviłupo de standard verti e Software Łìbaro, traverso de prosesi de revizion paritaria verti e trasparenti
Seben che i menbri de ła nostra comunità i venje da anbienti diversi asà, A vałorizemo łe sielte parsonałe e ła trasparensa, che ła se traduze prategamente inte na mejo conpatibiłità, na mejo utiłità, e inte l'asensa de lock-in par l'utente finałe. A credemo che el Software Łìbaro el pose ofrir mejo cuałità, mejo afidabiłità, seguresa e flesibiłità respeto a łe altarnadive propietarie.
Ła comunità dadrìo a LibreOffice ła ze el cor de'l projeto; sensa de ła comunità A no gavarìsimo łe resorse par continuar a dezviłupar el nostro software. Ła pasion e l'enerzìa che onji individuo el ghe porta a ła comunità łe deventa dezviłupo cołaboradivo, che el va tante volte oltra asà respeto a łe nostre aspetadive. A ve invitemo a unirve a nualtri par jutarne a réndar LibreOffice pì conosùo e acesìbiłe par tuti.
I Statudi de ła Document Foundation, dezviłupài da i stesi menbri de ła nostra comunità, i contien łe łinee guida de'l nostro łaoro. Traverso de el dòparo de łisense copyleft cofà GNU Lesser General Public License, Mozilla Public License, e Creative Commons Attribution-ShareAlike License, A protezemo i nostri deriti cofà dezviłupadori e creadori de contenjudi.
Se A ve catè intaresài a saver chi che dezà el ghe contribuise a'l projeto LibreOffice vizitè ła pàjina de i Reconosimenti. A confidemo de védar presto anca el vostro nome!
Par mejo informasion so come che ła comunità ła proteze i vostri deriti e so come che l'organizasion no-profit TDF ła zestise projeti cofà LibreOffice, vardè ła nostra Privacy Policy e łe Informasion łegałe.
Follow Us