Acesibiłità

LibreOffice el ze dezenjà co gran ocio par l'acesibiłità, par réndar ła suite sénplise e àjiłe da doparar, e par respóndarghe a łe nesesità de utenti co ezijense partegołare. A ze posìbiłe łèzar anca altre informasion bone so l'acesibiłità so'l nostro wiki (pàjina deso par deso solche par ingleze). Se rescontrè carense o buzi inte łe informasion o inte ła manuałìstega, considarè ła posibiłità de jutar a mejorarle, comunegòndoneło traverso de łe nostre mailing list, o anca considarè ła posibiłità de partesipar cofà cołaborador a'l projeto.

Łe sesion de 'sta pàjina łe ze cuełe drioman:

    1. Navegasion co tastiera
    2. Cołori e caràtari
    3. Tecnołozìe asistive
    4. Documentasion
    5. Altre caratarìsteghe de acesibiłità

Navegasion co ła Tastiera

Piena navegasion e controło co ła Tastiera

Ła piena navegasion co tastiera ła ghe fornise a i utenti ła posibiłità de ezeguir co tastiera onji insarimento, sensa doparar el mouse o altri dispozidivi.

Łe caratarìsteghe che łe mejora partegołarmente l'acesibiłità łe ciapa rento:

  • Definision conpleta de łe scurtarołe da tastiera inte łe difarente aplegasion;
  • Acesibiłità piena de łe zbare de i strumenti da tastiera;
  • Posibiłità de doparar ła tastiera par canbiar el documento, el menù, ła zbara de i strumenti o ła fenestra ativa;
  • Mejoramento de ła navegasion da tastiera rento de documenti de testo e guida in łinea par ła navegasion e l'ativasion de cołegamenti ipartestuałi;
  • Voze de menù e zbara de i strumenti par acédarghe a łe funsioni che senò łe ze acesìbiłe solche via mouse;
  • I ojeti de menù dezabiłitài i vien mostrài par inpostasion predefenìa;
  • Posibiłità de acédarghe a i sujerimenti diretamente da tastiera;
  • Posibiłità de inpostar par cuanto tenpo mostrar i sujerimenti;
  • Aceso da tastiera par i Ojeti de dezenjo:
    • I ojeti de dezenjo i pol èsar insarìi traverso de ła zbara de i strumenti co pozision e dimension predefenìe;
    • Onji maneja de i ojeti de dezenjo ła ze sełesionàbiłe e controłàbiłe singołarmente anca da tastiera, e A ze donca posìbiłe modifegar anca i połìgoni;
  • Ocio partegołar A ghe ze stà dà a l'acesibiłità inte łe fenestre de diàłogo, co anca:
    • ła parsonałizasion de łe zbare de i strumenti;
    • un controło łargo par łe inportasion de CSV inte i foji de càlcoło.

 

 

Cołori e caràtari

Dòparo de i Schemi de Cołor de Sistema, Alto Contrasto

LibreOffice el se adata a i schemi de cołor e inpostasion de contrasto configurài par el sistema oparadivo.

In zonta, LibreOffice l'ofre inpostasion in pì par i cołori che no i sipie mìa insenjài spesifegadamente rento schemi de cołori de'l sistema, oltra che a ła posibiłità de sorascrìvar i cołori de'l schema cołori corente. LibreOffice el parmete anca de crear e salvar conbinasion de cołori parsonałizàe.

El sistema de juto el respeta i paràmetri de ła conbinasion de cołori corente, ma l'ofre anca diversi stiłi predefenìi altarnadivi. I utenti i pol parsonałizar ła formatasion de i contenjudi de ła guida de juto, traverso de'l file de trasformasion XSL, come anca traverso de'l file de'l fojo de stiłe parsonałizà che'l se cata inte ła carteła de ła guida de juto.

Cołor Automàtego de'l Testo

Tute łe aplegasion de LibreOffice łe suporta un cołor automàtego de'l testo e łe ło dòparao cofà predefenìo, donca el testo el ze senpre distinguìbiłe da'l cołor de'l fondo.

El testo el sarà mostrà inte'l cołor de sistema utiłizà par i testi. Se 'sto fato el porta a un testo scuro so fondo scuro, o a un testo ciaro so fondo ciaro, el testo el sarà portà a bianco o moro (in modo da garantir el mejo contrasto posìbiłe).

Per łèzar documenti veci o inportài che i dòpara formatasion rìjide inte i cołori de testo, A podì doparar l'opsion “Utiłiza cołor de'l caràtare automàtego par łe inpostasion de'l schermo”. Tuto el contenjudo testuałe, cusita come anca bordi de tabełe e altri ełementi, i sarà vizuałizài inte'l cołor de'l caràtare predefenìo.

Icone e Bitmaps

LibreOffice el parmete de sernir icone par zbare de i strumenti sipie pìcołe che grande, in modałità normałe o a alto contrasto. 'Sto fato el rende łe icone pì fasilmente identifegàbiłe inte łe difarente modałità.

Tuti i ełementi de l'Intarfasa Utente che łe mostra na parte gràfega łe ofre na altarnadiva in modałità a alto contrasto.

LibreOffice el sernise automategamente el tipo de icone e de gràfega pì juste co łe inpostasion de sistema corente.

Modałità a alto contrasto par Impress e Draw

Impress e Draw i ofre na modałità a alto contrasto, ndove che i ojeti i ze mostrài sensa cołori de inpienasion o de'l testo.

'Sta modałità ła sarà automategamente ativa se A se sełesiona ła modałità a alto contrasto inte łe inpostasion de sistema. A ze parò posìbiłe dezativar 'sto rełevamento intarvenjendo inte łe opsion de LibreOffice a ła voze “Acesibiłità“.

Tipi de caràtare de sistema

LibreOffice el ze in grado de utiłizar el caràtare defenìo da'l sistema oparadivo par l'interfasa utente, in modo da prezentarse co'l mèdemo caràtare de łe altre aplegasion, e el pol èsar modifegà traverso de łe inpostasion de sistema.

Na inpostasion partegołar ła inpedise che, fuse ch'A se dezidarase doparar caràtari grandi, łe fenestre de diàłogo łe ecede łe dimension de'l schermo.

Altre caratarìsteghe de łezibiłità

  • Voze de menù e zbare de i strumenti, co łe ze evidensiàe, łe ze fasilmente parsepìbiłe;
  • A eziste na evidensiasion partegołar par riga e cołona corente inte i foji de càlcoło;
  • Posibiłità de ativar/dezativar łe animasion de gràfega e testi.

 

 

Tecnołozìe Asistive

API par el suporto de łe Tecnołozìe Asistive

I strumenti de łe Tecnołozìe Asistive (AT) cofà screen readers (łetori de schermo – aplegasion software che łe identìfega e łe intèrpreta el testo mostrà so'l schermo) e ingrandidori de schermo, cusi come anca altri strumenti, i se conete a LibreOffice doparando łe API par l'Acesibiłità de Java (JAA) traverso de'l Java Access Bridge par Windows o GNOME.

LibreOffice el dòpara API de Acesibiłità UNO (UAA), ndove che tuti i ełementi de l'intarfasa utente e de i documenti i mete fora tute łe informasion so de łori stesi e so'l só contenjudo.

UAA e JAA i ofre serti vantaji respeto a i modełi off-screen de i strumenti AT o de łe API de Microsoft Active Accessibility (MSAA). UAA e JAA i fornise informasion reładive a'l contenjudo de'l documento, cusita che i strumenti AT no i ga mìa de bezonjo de informasion traverso de łe API de łe varie aplegasion, o ingansàndose a i driver video.

Un gran sforso el ze staà profondesto par far sì che ełementi de l'intarfasa utente e contenjudi de i documenti i ghe dae pien suporto a łe intarfase de acesibiłità; par ezenpio fornindo testo co atribudi e informasion so i łìmiti de i caràtari, e mandando tute łe notìfeghe nesesarie e fornindo nomi e descrision de i controłi.

Tuti i strumenti de łe Tecnołozìe Asistive (AT) che i ze boni de łaorar co aplegasion Java traverso de'l Java Access Bridge i funsiona anca co LibreOffice.

Łe API de Acesibiłità de Java łe ze suportàe da i strumenti pì popołari de AT, co anca:

  • Łetor de schermo JAWS;
  • Łetor de schermo ZoomText e łente de ingrandimento;
  • Łetor de schermo Gnopernicus e łente de ingrandimento;
  • Tastiera a schermo de GNOME (GOK).

Serti strumenti de AT i ghe manda eventi ciave a łe aplegasion traverso de un siclo de mesaji, o senplisemente controłando el mouse, cusita ch'A no ghe sipie difarense par l'aplegasion par i dati insarìi da utente o da strumenti AT.

Inte 'sto modo, tanti strumenti de AT cofà par ezenpio sénplisi tastiere a schermo, mouse controłài co ła testa, trasamento vizivo e intarutori ùnjołi i podarà èsar doparài co LibreOffice.

Suporto par ła łetura còmoda de documenti in sola łetura

I utenti che i dòpara łetori de schermo serte volte i cata dełe dificoltà so ła fruision de documenti de soła łetura parché no i pol navegar inte'l documento doparando el cursor.

Par 'sto motivo, A ghe ze ła caratarìstega "Doparar el cursor in modałità sełesion testo rento documenti de soła łetura".

Altre caratarìsteghe de AT

  • Fenestre mòbiłe, fenestre de diàłogo e menù i ze fenestre de sistema;
  • Posibiłità de atribuirghe un nome a onji ojeto de dezenjo ùnjoło;
  • Tuti i documenti de ezenpio e i modełi i ze mejorài par fornir nomi e descrision de i ojeti de dezenjo.

 

 

Documentasion

Documentasion acesìbiłe

Tuta ła documentasion utente ła ze fornìa inte i formadi ODT e PDF in modo che i utenti i pose doparar łetori de schermo e łente de ingrandimento par łèzar ła documentasion. Par mejo informasion par via de ła documentasion, vizitè ła pàjina de documentasion de 'sto sito, o ła pàjina de documentasion de'l nostro wiki.

Tute łe scurtarołe da tastiera łe ze documentàe inte ła guida in łinea.

Acesibiłità de ła Guida in łinea

Ła guida in łinea ła ofre informasion so come doparar tute łe caratarìsteghe de Acesibiłità de LibreOffice.

'Sta guida ła rezulta acesìbiłe autonomamente. I utenti i pol acédarghe doparando łetori de schermo, łente de ingrandimento e tastiere a schermo.

 

 

Altre caratarìsteghe de acesibiłità

A ze pardepì disponìbiłe altre caratarìsteghe bone par l'acesibiłità:

  • Ingrandimento e redusion de'l zoom de un documento;
  • Pozisionamento de'l mouse so'l boton predefenìo o in sentro de łe fenestre de diàłogo;
  • Configurasion:
    • Asenjasion de scurtaroła da tastiera a un comando;
    • Posibiłità de mostrar tuti i comandi inte i menù;
    • Redimensionamento de i botoni de łe zbare de i strumenti;
    • Parsonałizasion de menù e zbare de i strumenti;
    • Posibiłità de mostrar o scóndar zbare de i strumenti;
    • Creasion de zbare de i strumenti parsonałizàe;
  • Reałizasion de automatizmi:
    • Coresion de łe parołe zbałiàe durante ła dijitasion;
    • Inpostasion ràpida de łe opsion de Autocoresion e Copia;
    • Posibiłità de zontar voze de autocoresion par erori de ortografìa e batidura;
    • Dòparo de'l conpletamento automàtego;
    • Creasion automàtega de voze de testo automàtiego par testi e fraze de dòparo comun e frecuente.

Latest Tweets

@libreoffice
@tdforg