Base

Base el ze un database front-end parfetamente integrà co l'anbiente desktop e sioro de caratarìsteghe intaresante. El ze projetà par sodisfar łe nesesità de na gama anpia de utenti de ànbiti difarenti; el ghe responde a łe ezijense de i utenti pì avansài e de łe inpreze e el fornise driver nativi par serti de i sistemi de zestion de database pì difondesti in ànbito multi-utente: MySQL, Adabas D, MS Access e PostgreSQL. Pardepì, el suporto integrà par i driver standard JDBC - e ODBC - el parmete de conétarse prategamente a onji altra sorte de motor ezistente.

Se gavì de bezonjo de un database che'l responda a łe ezijense de un utente soło, Base el ze za configurà co'l motor rełasionałe HSQL. A se trata de na sołusion ideałe par ezijense sénplisi e par parsone che łe ga de bezonjo de un sistema fàsiłe da capir e da doparar: i dati i ze inmagazinài direti inte'l file Base e A ghe ze anca el suporto nativo par file prodoti in anbiente dBase. Base el ze fornìo de strumenti automàteghi par jutar chi che'l dòpare par ła prima 'olta un database (o pì senplisemente Base) a crear tabełe, reserche, mòdułi e report, e el contien na serie de tabełe preinpostàe ùtiłe a łe atività de reserca de beni, clienti, órdeni de véndita, fature e artanti altri ełementi de dòparo comun.

Base el ze de pì asè de un strumento da doparar autonomamente: el ze anca parfetamente integrà co tute łe altre aplegasion de ła suite LibreOffice: Base el pol fornir i dati de ła rùbrega par ła stanpa union in Writer, doparando el protocoło standard LDAP, o senò altri formadi de ełenco. Base el pol èsar doparà par crear aree de dati cołegàe inte i file de CALC, par l'anàłize de tabełe pivot o cofà baze de dati par i gràfeghi.